Ishq

ishq mujhako nahii.n vahashat hii sahii
merii vahashat terii shoharat hii sahii

qataa kiije na ta'alluq ham se
kuchh nahii.n hai to adaavat hii sahii

mere hone me.n hai kyaa rusvaa_ii
ye vo majalis nahii.n Khalvat hii sahii

ham bhii dushman to nahii.n hai.n apane
Gair ko tujh se mohabbat hii sahii
apanii hastii hii se ho jo kuchh ho
aagahii gar nahii.n Gafalat hii sahii

umr har cha.nd ke hai barq-e-Khiraam
dil ke Khuu.N karane kii fursat hii sahii

ham koii tarq-e-vafaa karate hai.n
na sahii ishq musiibat hii sahii

kuchh to de ai falak-e-na_i.nsaaf
aah-o-fariyaad kii ruKhasat hii sahii

ham bhii tasliim kii Khuu Daale.nge
beniyaazii terii aadat hii sahii

yaar se chhe.Daa chalii jaaye "Asad"
gar nahii.n vasl to hasarat hii sahii

dono.n jahaa.N

dono jahaan deke vo samajhe ye Khush rahaa
yaa aa padi ye sharm ki takaraar kyaa kare
thak thak ke har maqaam pe do chaar rah gaye
teraa pataa na paaye to naachaar kyaa kare
kyaa shamaa ke nahii hai havaa Khvaah ahal-e-bazm
ho Gam hii jaan gudaaz to Gam Khvaar kyaa kare....